الاثنين، 13 أكتوبر 2008

الاقتصاد

هل أنت اقتصادى ؟





هل نحن اقتصاديون ؟ أم نفضل الاسراف ؟

وهل لدينا فائض فى الميزاية ؟ أم أن المرتبات لا تكفى ؟

ما الذى يمكن أن تفعله إذا وجدت سلعة تريدها ومرتفعة الثمن بحيث لا تقدر عليه ؟

وما هو موقفك إذا وجدت سلعة موجودة فى مكانين بسعرين متفاوتين ؟ أيهما تشترى ؟

وهل من الممكن أن تشترى سلعة أنت لست فى حاجة إليها ؟



تلك الأسئلة راودتنى بعد أن وجدت العديد من الأصدقاء يشترون أشياء لا تلزمهم أحيانا أو بأسعار أغلى من إمكانياتهم

هذا غير أن البعض يصر على أن يشترى من الأماكن الشهيرة وإن كانت الأثمان فيها قد أصبحت خيالية أكثر مما يحتمل الأمر وفى النهاية الكل يشكو من تكاليف المعيشة

هناك 43 تعليقًا:

romansy يقول...

فعلا والله يا ازهرى
دى حاجه تجنن
ازاى احنا دوله ناميه
واحنا عندنا فى مصر احدث الموبيلات
والعربيات
وليه احنا دوله استهلاكيه اكتر من انتاجيه
موضوع جميل يا ازهرى

jehan يقول...

بص يا ازهرى

علشان احنا مش عندنا ثقافة اقتصادية بمعنى ان اى ربة بيت لو بصيت على الفائض من الاكل عندها او اى حاجة فى البيت هتلاقى ان الفايض ممكن ياكل اسرة تانية


+ ان احنا عندنا حب المنظرة وان دايما الى بيلبس احلى واغلى هو دايما الافضل

+ ان فى فعلا ناس بتحب تشترى من الاماكن الغالية على اعتبار انها هى اضمن وافضل

انا عن نفسى بفضل الارخص ى اى مكان مادام هيقضى الغرض وخلاص


جوجو (صاحبة مدونة خواطر )

PrInCeSS BeRy يقول...

ازيك يا ازهرى اتمنا تكون بخير

هقلك حاجة تساؤلاتك فى محلها السمة اللى كانت مميزة لينا واللى ممكن تكون قلت دلوقتى اننا لا بنبطل اكل ولا بنبطل نشترى ولا بنبطل نتقنعر والخ

بس اقلك دة قل لية لان اصلا الشعب غلبان مبقاش لاقى ياكل علشان يشترى ويعمل ويسوى ربنا يسترها علينا بجد احنا فى كارثة كبيرة جدااااااا وتحياتى لك ولاسلوبك المميز

غير معرف يقول...

عزيزي الأزهري

شوف احنا كمصريين لما بنسمع مثلا ان فيه سلعه معينه معمول عليها تخفيض في السوبر ماركت و ممكن مانكونش محتاجينها برضه نروح و نشتريها و نقول يمكن تنفع و ممكن تفضل عندنا لحد ماتنتهي فتره صلاحيتها
بره بقه عندهم ترشيد في الاستهلاك مابيجبوش الا اللي هما عايزينه و بالكميه اللي عارفين انهم حيحتاجوها
المشكله مشكله عقليات في رأيي
تحياتي ليك علي الموضوع المميز

kochia يقول...

اكيد الطبع ده من مخلفات الاستعمار والحروب والضغط المادي الفظيع اللي علي الناس
التخزين ده وشراء السلع الغير ضرورية حاجة مش عامة عند كل الشعوب ..
كمان عندنا فروق اقتصادية وطبقية بتخلي الناس تتحي تتمنظر علي بعض
عشان الطبقية عندنا لها تمن غير برده البلد الاخري اللي غالبا مش بتشوف فيها الاثار المترتبة علي الطبقية بشكل اجتماعي

بس قولي
هي الاسئلة مش هتخلص بقي
بس فكرة الاسئلة جميلة
بتخلي المخ للاسف يشتغل

Butterfly يقول...

أنا ؟ لأ طبعا
لكن فعلا فى ناس غريب وخصوصا اللى مش معاهم فلوس .
بيحبوا يتمنظروا أوى وكلوا من فلوس الشحاته !!!

Rania Lelah يقول...

عجبنى اعلان احسبها صح تعيشها صح
فعلا على الرغم من اننا دوله ناميه و و فى مصر مدن تحت خط الفقر
لا اننا بردة بنشوف ناس بتشترى حاجات مهوله و باسعار خياليه
بس منهم بتوع رسم و منهم فعلا غاويين كدة و متعودين على كدة

تحياتى

Unknown يقول...

فيه دارسة سمعت عنها بتقول الشعب المصرى اكتر شعب بيشترى حاجات مش لزماه لزوم المنظرة و بيسيب الى يلزمه

maha zein يقول...

بص
في ناس عنده نقص
يعني مش بيحسوا بروحهم غير لما بيرضوا الحتة دي عندهم
يعني ياكل في المطاعم الغالية ويشتري لبس غالى حتي لو نفسه برة ارخص
لكن كل ده
عشان يقنع نفسه انه بيعمل ده
بتبقه حاجة نفسية
عموما طالما هو مبسوط كده خلاص
انا عن نفسي ممكن اشتري حاجة غالية اه بس لازم تبقه تستاهل
بعتبر روحي حريصة شوية
مش اصرف في الهبل ابدا
لازم اكون مقتنعة وعرفة الفايدة
متشغلش بالك انت

Unknown يقول...

احنا فعلا عندنا حب المظاهر بطريقة غريبه جدا

يعني المهم اني يكون معايا موبيل احدث موديل ومش مهم محتاجه ولا لأ او فيه رصيد اتكلم منه ولا لأ

والمهم يبقي معايا عربية حديثة ومش مهم فيها بنزين ولا لأ

انا مش عارفه الثقافه دي جايلنا منين؟

rovy يقول...

السلام عليكم

اخى الازهرى .. موضوع البوست هام فعلا
واكيد لو اننا كلنا اتعلمنا ازاى نقدر نكيف احتياجتنا مع قدرتنا الماليه و اتعودنا نسأل على الثمن المضبوط والمناسب لاى سلعه احنا عاوزينها حتفرق كثير جدا معانا و كمان مع التجار اللى بيلعبوا فى الاسعار براحتهم ..

بوست متميز احييك عليه ..

عاوزه كمان اشكرك بالنيابه عن مريومه على الكلام الجميل اللى قلته عنها و كان نفسى نكون نسايب بس اعمل ايه فى اللى سبق .. حماتها يا سيدى واحده من بنات صاحبة الجلاله حبايبى و لا يمكن ارجع فى كلمتى معاها .. معلش تتعوض ان شاء الله ..

تقديرى و تحياتى

كوارث يقول...

هل نحن اقتصاديون ؟ أم نفضل الاسراف ؟
اعتقادي أننا اقتصاديون نفضل الاسراف ‍!!

وهل لدينا فائض فى الميزاية ؟ أم أن المرتبات لا تكفى ؟
هذه امور يفضل سؤال الكروش الكبري في الدولة عنها .. أذكر أنه كان في 2007 22 مليار جنيه مصروفات اضافية للحكومة .. اين تذهب ؟ وما بالك بالمصروفات الرئيسية اصلا !!

ما الذى يمكن أن تفعله إذا وجدت سلعة تريدها ومرتفعة الثمن بحيث لا تقدر عليه ؟
بالتاكيد سأنتظر حتى يتوفر الثمن أو لن أشتريها مطلقًا .. لا شيء آخر وان كانت ضرورية فأعتقد أنني سأسرقها ان نام الضمير كعادته!

وما هو موقفك إذا وجدت سلعة موجودة فى مكانين بسعرين متفاوتين ؟ أيهما تشترى ؟
الأرخص طبعًا

وهل من الممكن أن تشترى سلعة أنت لست فى حاجة إليها ؟
لا أعتقد ..
هناك مثل شهير
اللي معاه قرش محيره .. يشتري حمام ويطيره ..
حتى المليارديرات لم يصلوا بعد لمرحلة شراء الحمام واطلاقه !

موناليزا يقول...

فعلا هناك افراد كثير مسرفون
ولكن اذا كنت تبحث عن اجابة منى
فانا بفضل الله لا افضل ان اشترى حاجة وانا مش محتاجاها
==========
ممكن تشيل تاكيد الكلمة حين ارسال التعليق

الازهرى يقول...

العزيز رومانسى

تخيل اننا الدولة الاولى على العالم فى الاستهلاك للمواد غير الضرورية

تحياتى

الازهرى يقول...

عزيزتى جيهان

يارب نخلص من حب المنظرة اللى جايبنا لوره

ويارب يكملك بعقلك دايما


تحياتى

الازهرى يقول...

عزيزتى الاميرة بيرى

يا رب يخليكى ويديم المودة


تحيل جيد

والمشكلة ان ده بيؤدى الى تفاقم المشكلة وليس انتهائها

تحياتى وشكرا على الاطراء

الازهرى يقول...

العزيزة جدا اجندا حمرا

بالفعل السبب الرئيسى للمشكلة هى ترشيد الاستهلاك
لاننا لو اكتفينا بما نريد فلن يكون هناك زيادة فى الطلب عن العرض وبذلك لن ترتفع الاسعار
كما ان هذا سيوفر الكثير من المصاريف التى تحتاجها الاسرة

تحياتى وشكرا على المديح

الازهرى يقول...

كوشيا الذكية

بالفعل احد الاسباب ان
كمان عندنا فروق اقتصادية وطبقية بتخلي الناس تتحي تتمنظر علي بعض
عشان الطبقية
وتبدأ المتسلسلة التى تنتهى غالبا بالانفجار حيث لا يستطيع ان يصبح مثلهم ولايقنع بما هو فيه

تحياتى وانتظرى المفاجأة فى الموضوع القادم

الازهرى يقول...

جميلتى الفراشة

يا رب نشوف الكل زيك
علشان حالنا ينصلح

تحياتى

الازهرى يقول...

العزيزة شهد الكلمات

هنا القاهرة تنادى

تلقينا الاشارة وجارى الاعداد للزياة

تحياتى

الازهرى يقول...

العزيزة رانيا

اضم صوتى اليك بخصوص الاعلان فقد شاهدته عدة مرات اثناء رمضان

وربما كان هو الحسنة الوحيدة التى قدمها التليفزيون فى هذا الشهر الكريم
وارجوا ان يكون قد استمر فى فترة ما بعده وان يكون له صدى عند مستمعيه

تحياتى دوما

الازهرى يقول...

الصديقة العزيزة عاليا حليم

الدراسة حقيقية وصحيحة
وهى تبين كم المأساة التى صرنا اليها وارجوا ان نخرج منها قريبا على خير

تحياتى

الازهرى يقول...

العزيزة مها زين

للاسف لازم اشغل بالى
لاننى رأيت البلاد الاخرى وما توصلوا اليه بجهد الشعوب
وانا احب هذا البلد وسأظل احارب من اجله فاما ان ينصلح او انتهى انا

تحياتى

الازهرى يقول...

العزيزة اسراء

انا مش عارفه الثقافه دي جايلنا منين؟

للاسف الثقافة كما قالت احدى الصديقات من مخلفات الاستعمار
كما انه عند مشاهدتك لاى برنامج تليفزيون عن الازياء او الديكور او الطعام والتى اصبحت منتشرة بشدة
ستعلمين جيدا المصدر

تحياتى دوما

الازهرى يقول...

الصديقة العزيزة ام مريم

وعليكم السلام ورحمة الله وبركاته

اضم صوتى اليك ونتفق فى الرأى

وبخصوص النسب انا الخسران بالتأكيد
ولو انى بقول ان الثقة فى بنات اصحاب الجلالة مش ولا بد وليس هذا لغرض لا سمح الله وان الافضل تكرشيها وكمان انا جاهز مش مضطرين نستنى كتير

تحياتى ويا رب تدوم المحبة

الازهرى يقول...

العزيز كوارث

تقول ان
اللي معاه قرش محيره .. يشتري حمام ويطيره ..
حتى المليارديرات لم يصلوا بعد لمرحلة شراء الحمام واطلاقه !

صدقنى محدودى الدخل يفعلون هذا وعندى من الامثلة الكثير

تحياتى

الازهرى يقول...

الصديقة العزيزة موناليزا

ربنا يكملك بعقلك
وان كنت ابحث عن اجابة عامة

اسف لاننى جعلتك تطلبين موضوع تأكيد الكلمة مرة اخرى ولكنه الانشغال فى العمل

تحياتى

mohamed ghalia يقول...

أخى العزيز وأخى فى الله
هل نحن اقتصاديون ؟ أم نفضل الاسراف ؟
هذا يتوقف من شخص لأخر ولا مقياس له فهو يتوقف على دخل الشخص.
وهل لدينا فائض فى الميزاية ؟ أم أن المرتبات لا تكفى ؟
أعتقد أنا كل منا يعيش على مستواه ولا يوجد فائض والمرتبات طبعا فى مصر لا تكفى.
ما الذى يمكن أن تفعله إذا وجدت سلعة تريدها ومرتفعة الثمن بحيث لا تقدر عليه ؟
إذا كانت الحاجة ملحة فسأشتريها مهما استغل صاحبها ورفع الثمن
أما اذا كنت لا احتجها فلن اشتريها رغم أن هناك الكثير من المصريين يشترون لمجرد أن يكون معهم الموديل الأحدث.
وما هو موقفك إذا وجدت سلعة موجودة فى مكانين بسعرين متفاوتين ؟ أيهما تشترى ؟
أكيد بدون تفكير من المكان ذو السعر الأقل.
وهل من الممكن أن تشترى سلعة أنت لست فى حاجة إليها ؟
لا ولكن هناك من المصريين من يشتروا أشياء لا يحتاجون إليها
نعم الكل يشكو من تكاليف المعيشة ولو تدبرنا قليلا لعيشنا حياة هانئة بأقل من ذلك
تحياتى
مشكور على الأسئلة الرائعة
دمت بود

"عبير النجار "نيجار يقول...

لأ طبعا انا مش اقتصاديه
والشعب المصري كله مش اقتصادي
بص انا هقولك حاجه بالنسبه لمنتج في مكانين وفي مكان اغلى من التاني انا ساعات بقول ما يمكن غالي هنا علشان متصنع احسن وفعلا بلاقى كان عندي حق في تفكري وعلشان كده دايما تسمع المقوله اللي بيقول الغالي تمنه فيه،
تحياتي ليك

الازهرى يقول...

الغالى محمد غاليا


ولكن هناك من المصريين من يشتروا أشياء لا يحتاجون إليها

المشكلة يا صديقى انهم الان يشكلون الاغلبية

نعم الكل يشكو من تكاليف المعيشة ولو تدبرنا قليلا لعيشنا حياة هانئة

لا اتفق معك فى هانئة مع ارتفاع الاسعار الجنونى ولكن اقول افضل مما هى عليه

تحياتى

الازهرى يقول...

عاشقة الاسفار مثلى
العزيزة نيجار

ولم لا نكون اقتصاديين
سأروى ك دراسة لذيذة واظنها معروفة

قام احد محلات بيع الاحذية التى كان صاحبها يحب السخرية بعرض زوجين من الاحذية زكتب امامهما
انهما متطابقان فى كل شىء الا ان احدهما ثمنه 120 جنيه والاخر 60 جنيه فقط
كانت النتيجة ان 9 من كل 10 اشخاص اشتروا الحذاء الغالى

تحياتى عزيزتى

Mony يقول...

فعلا عندك حق

لكن في رأيي

الدش عمل للناس تربنة في مخها

الاعلان دلؤتي بيخلي الناس تجري علي الحاجة حتي لو مش عايزاها


لمجرد للاستجابة لمغريات الاعلان



لكن قبل انتشار التلفزيون و الدش الناس كانوا عاقلين
و مابيشتروش الا اللي هم محتاجينه بس

أسماء علي يقول...

اممممممممم

سأخبرك يا صديقي

اذا كنت أود تلك السلعة المرتفعة الثمن .. أودها فعلا

بكل هدوء سأدخر ثمنها

..

سأشتري بالطبع السلعة المتواجدة في المكان الأرخص لكن قبل أن أفعل ذلك سأتأكد أنهما متماثلان
..

لكن سلعة لستُ بحاجة إليها لا أشتريها و صراحة ظللت فترة أعلم نفسي أن أفعل ذلك :)

...


امممممممممم

ما رأيك اذا ؟؟

...

أعتقد أن البعض لديه هوس الشراء و أحيانا حب التفاخر

لكن هل الحالة الإقتصادية رائعة لدرجة الرفاهية حقا ؟

الازهرى يقول...

العزيزة مونى

رأى آخر يقول ان الاعلام هو المتهم الاول

تحياتى على الرأى الجميل
واهلا بك دوما

الازهرى يقول...

الصديقة العزيزة د. اسماء على


تعليق جميل
وتحياتى على الروح المثابرة فى التعلم
للاسف الحالة الاقتصادية فى غاية السوء ومع ذلك نرى تلك الامثلة واضحة وكأنه هوس منهم

تحياتى

بنت مصريه يقول...

والله يا ازهرى ف الاول والاخر دى مسالهمستويات
يعنى فيهواحد ربنا مسهلها معاه شويه يقولك الغالى تمنه فيه
وفيه واحد امكانياته الماديه لا تسمح
فبيشترى الحاجه اللى سعرها على قده واللى محتاجها

لتنين بقى بيشتكو من زياده الاسعار ليه
اللى مستواه الاقتصادى محدود لازم يشتكى عشان مش معاه فلوس يشترى حتى الحاجه اللى محتاجها

والله حالته الاقتصاديه كويسه بيعتبردا سرقه ونهب لما حاجه امبارح تكون ب 5 جنيه
واصبح انهارده الاقيها هيه هيه ب 11 جنيه

لازم لتنين يعترضوا

الازهرى يقول...

الصديقة بنت مصرية

اتفق معك فى حتمية الشكوى

ولكن السؤال هو لماذا من ليس معه وحلته ضعيفه يكلف نفسه ما لا يطيق

تحياتى

إيمان قنديل يقول...

أسمح لي أن أجيب عن الأسئلة بطريقة شخصية بدون تعميم
1==أنا مسرفة

2==أحيانا يكون لدي فائض وكثيرا لا

3==لا أشتري تلك السلعة إلا إذا كنت في حاجة ماسة لها

4==اشتري من المكان الأرخص

5--كثيرا أشتري سلعا لاحاجة لي بها، ولكنني لا أعرف ذلك إلا عندما أعود للمنزل وأشعر بالندم

maha zein يقول...

مش قلتلك انا متشغلش بالك
مصمم يعني
شكرا علي زيارتك ليا
بقولك ايه في تحديث مهم كتبته اتمني تروح تشوفه يعني بردو

الازهرى يقول...

الصديقة كباريه

عافاكى الله من الاسراف

اما بخصوص الاشياء التى تشتريها ولست بحاجة اليها فهناك نصيحة قالتها احدى الصديقات وهى
ان تكتبى ما انت بحاجة اليه قبل ذهابك الى هناك وتلتزمى بشراء ما كتبته فقط
وبذلك يمكن حل المشكلة
المهم هو الارادة

تحياتى

الازهرى يقول...

العزيزة مها

تقبلت النصح

واريد رأيك فى الموضوع الجديد

تحياتى

nor elyaqeen يقول...

للاسف الشدبد الكثير منا ي>هب لشراء الاشياء من الاماكن باهظة الثمن رغبة فى التفاخر و التباهى أمام الناس ليس اكثر مع إنه ليس فى حاحة إليها ولا أعتقد أن ه>ا الشخص يفكر فى الفقير و المسكين ال>ى لا يجد قوت يومه ل>ا
علينا بالإعتدال فى كل شىء أعجبتنى مدونتك جزاك الله خير

الازهرى يقول...

الصديقة هبة طلبه

رأى سديد اتمنى ان ينتفع به الاخرون

وشكرا على الثناء الجميل واتمنى التواصل دوما

تحياتى